قىزىلوردادا مەملەكەت باسشىسى قاسىم-جومارت توقاەۆتىڭ توراعالىعىمەن ۇلتتىق قۇرىلتايدىڭ V وتىرىسى باستالدى. قۇرىلتاي وتىرىسىندا مەملەكەتتىك كەڭەسشى ەرلان قارين بۋرابايداعى قۇرىلتايدىڭ ناتيجەسىندە 6 زاڭ قابىلدانىپ, 10 زاڭ جۇمىسقا الىنعانىن مالىمدەدى, دەپ جازادى Egemen.kz.
وتكەن جىلعى قۇرىلتاي وتىرىسىنان كەيىن مەملەكەت باسشىسىنىڭ تاپسىرماسىن ورىنداۋ ماقساتىندا 53 تارماقتان تۇراتىن ارنايى جوسپار بەكىتىلىپ, جوسپار بويىنشا ءىس جۇرگىزىلگەن.
«بىرىنشىدەن, قۇرىلتاي باستاۋلارىن جۇزەگە اسىرۋ بارىسىندا پارلامەنت دەپۋتاتتارىنىڭ قولداۋىمەن بىلتىر 6 زاڭ قابىلداندى. بۇل زاڭدار بالالاردىڭ قاۋىپسىزدىگىن قامتاماسىز ەتۋ, قۇقىققا قايشى كەلەتىن كونتەنتتىڭ تارالۋىن شەكتەۋ, جەكەمەنشىك وبەكتىلەرگە اتاۋ بەرۋدى جۇيەلەۋ, قوعامدىق ورىنداردا بەت-ءجۇزدى بۇركەيتىن كيىمگە تىيىم سالۋ, ارحەولوگيا سالاسىن رەتتەۋ باعىتتارىن قامتىدى», دەدى ەرلان قارين.
ەرلان قارين وسى باعىتتا 10 زاڭ جوباسى جۇمىسقا الىنعانىن دا اتاپ ءوتتى.
بۇعان دەيىن پرەزيدەنت مەملەكەتتىك كەڭەسشى ەرلان قارينمەن جانە پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆپەن پارلامەنتتىك رەفورما بويىنشا كەزەكتى جۇمىس كەڭەسىن وتكىزگەن ەدى.
قۇرىلتاي قۋاتى
ەرلان قارين مەملەكەت باسشىسىنا 9 قاڭتاردا وتكەن جۇمىس توبىنىڭ وتىرىسىندا ءبىر پالاتالى پارلامەنتتىڭ بولاشاقتاعى ورنى, قۇزىرەتى مەن نەگىزگى مىندەتتەرى ايقىندالىپ, ونىڭ بيلىكتىڭ وزگە تارماقتارىمەن ءوزارا بايلانىسىن رەتتەيتىن ۇستانىمدار قاراستىرىلعانىن جەتكىزدى.